කරුණා අම්මාන් සිය ට්විටර් පණිවුඩය මගින් මේ බව සඳහන් කර ඇත. එහිදී අතුරුදන් වූ පුද්ගලයන් සම්බන්ධයෙන් මහින්ද රාජපක්ෂගේ රජයක් යටතේ විසඳුම් ලබා ගත හැකි බව ද ඔහු සඳහන් කර තිබේ.
පසුගිය කාලයේ රාජපක්ෂ ජාතිවාදී නඩය විසින් කොටි ලේබලය අලවා මාධ්‍ය ඔස්සේ එක දිගට අපහාසයට ලක් කළ ආනන්දි සසිදරන්ව දැන් පොහොට්ටුවට එක් කර ගැනීමේ තෝල්කයා වී ඇත්තේ කරුණා අම්මාන් ය.
ආනන්දි සසිදරන් සිය අතුරුදන් වූ සැමියා වන එල්ටීටීඊ දේශපාලන කොමිසාර්වරයකු වූ එලීලන් සසිදරන් ගේ අතුරුදන්විම සම්බන්ධයෙන් දිගින් දිගටම සටන් කළ අතර ඒ සම්බන්ධයෙන් රාජපක්ෂලාගෙන් ඇයට ලැබී තිබුණේ ත්‍රස්තවාදී ලේබලය ඇලවීම පමණි. එලිලන් හමුදා කඳවුරකට බාර වීමෙන් පසුව මරා දම ඇති බවට චෝදනා එල්ල වී තිබේ.
දෙමළ ජාතික සන්ධානයේ සහාය පොහොට්ටුවට නොලැබෙන පසුබිමක උතුරු නැගෙනහිර දෙමළ පුරවැසියන්ගේ ඡන්ද බිලි බාගැනීමේ වෑයම ආනන්දි සසිදරන් හරහා සිදු කිරීම පොහොට්ටු කල්ලියේ අරමුණ වී ඇති බවත් එහි මැදිහත්කරුවා ලෙස කරුණා අම්මාන් කටයුතු කරන බවත් පෙනී යන කරුණකි.
ආනන්දි සසිදරන් නිල වශයෙන් "ඊලම් තමිල් සුවයාච්චි කළහම්" (දෙමළ ඊළාම් ස්වාධීන සංවිධානය) යන නමින් සිය නව දේශපාලන පක්ෂය පසුගිය ඔක්තෝබර් 21දා ආරම්භ කර තිබුණි. ඒ අනුව එතෙක් තමා දැරූ දෙමළ ජාතික සන්ධානයේ සාමාජිකත්වයෙන් හා අමාත්‍ය ධුරයෙන් ඉවත් වන බව ඇය නිළ වශයෙන් ප්‍රකාශයට පත් කර තිබුණි. ආනන්දි සසිදරන් මහත්මිය ඉලංගෙයි තමිල් අරසු පක්ෂයට විරුද්ධව කටයුතු කරන බවට චෝදනා එල්ල වූ අතර, ඒ පිළිබඳව පක්ෂය පැවැත්වූ විනය පරීක්ෂණයකින් පසුව ඇයව පක්ෂ සාමාජිකත්වයෙන් ඉවත් කිරීමට තීරණය කෙරිණි.
