කොවිඞ් 19 වෛරසය ආසාදනය වු පාර්ලිමේන්තු මන්තී‍්‍ර ශී‍්‍ර ලංකා මුස්ලිම් කොංග‍්‍රස් නායක රවුෆ් හකීම් මාක්ස් පැළද නොසිට, මාක්ස් පළඳින්න යැයි ජනතාවට කියමින් රටට නීති හදන්න සුදානම් වන බව විපක්‍ෂයේ ප‍්‍රධාන සංවිධායක ලක්‍ෂමන් කිරිඇල්ල පවසනවා.

කොරෝනා අර්බුදයත් සමග ශ්‍රී ලංකාවේ විරැකියා ප්‍රතිශතය එන්න එන්නම වැඩිවෙමින් පවතින බවත් විදේස්ගත ශ්‍රමිකයන් ලංකාවට ගෙන්වා ගැනීමට දරන උත්සාහය හා සමානව අලුත් රැකියා අවස්ථා ලබාගැනීමේ උත්සාහයකත් රජය යෙදෙන බවත් ක්‍රීඩා හා තරුණ කටයුතු අමාත්‍ය නාමල් රාජපක්ෂ පවසනවා.

පළාත් සභා මැතිවරණය කඩිනමින් පැවැත්විය යුතු බවට දේශපාලන පක්ෂ ලේකම්වරු මැතිවරණ කොමිෂන් සභාවට ඊයේ (11 වැනිදා) දැනුම් දී තිබේ.

අධිකරණයට අපහාස කළේ යැයි චෝදනා එල්ල වු හිටපු රාජ්‍ය අමාත්‍ය රන්ජන් රාමනායක මහතාට බරපතළ වැඩ සහිත වසර 4ක සිරදඬුවමක් නියම කර තිබේ.

කොරෝනා වෛරසයට එරෙහි එන්නතක් චීනය මගින් මෙරටට ලබා ගැනීමේ ක්‍රියාවලිය සම්බන්ධ සාකච්ඡා ආරම්භ වී තිබේ.

2021 අයවැයේ යෝජනා කර ඇති නව බදු ක්‍රමය හඳුන්වා දෙන තෙක් දේශීය ආදායම් දෙපාර්තමේන්තුව භාණ්ඩ හා සේවා බදු එකතු කිරීම නවතා දමා ඇති බැවින් රජයේ ආදායම් රැස් කිරීමේ ක්‍රියාවලිය අර්බුදයට ලක්ව ඇත.

දැනට උද්ගතව ඇති තත්ත්වය මත පාර්ලිමේන්තු කාර්ය මණ්ඩලය හෙට (13 වැනිදා) සහ අනිද්දා (14 වැනිදා) පාර්ලිමේන්තු සංකීර්ණයේදීම පී.සී.ආර්. පරික්ෂණවලට ලක් කිරීමට තීරණය කර ඇත.

අද (12) උදෑසන වන විට නව කොවිඩ් ආසාදිතයින් 569 දෙනෙකු හඳුනාගෙන ඇති බව කොව්ඩ් 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානය නිවේදනය කරයි.

මෙම ආසාදිතයින් 569 අතරින් එක ආසාදිතයෙක් පමණක් විදෙස් රටකින් පැමිණි ශ්‍රී ලාංකිකයෙක් බවයි වාර්තා වෙන්නේ.ඒ සමගම මෙරට සමස්ත ආසාදිතයින් සංඛ්‍යාව 48,949 ක් දක්වා ඉහළ ගියේ ය.

ඉන් 6626 දෙනෙකු මේ වනවිට රෝහල්ගතව ප්‍රතිකාර ලබන අතර, සුවය ලැබූ සමස්ත ආසාදිතයින් සංඛ්‍යාව 42,091 කි.

ඊයේ තවත් කොරෝනා මරණ 8ක් තහවුරු වීමත් සමග මෙරට කොරෝනා මරණ සංඛ්‍යාව 240 දක්වා ඉහළ ගොස් තිබේ. එම මරණ සියල්ලක්ම විවිධ අසනීප තත්වයන්ගෙන් පෙළුණු පුද්ගලයින් බවයි තහවුරු වී ඇත්තේ.

-පංචාලි අබේසේකර