මෑත කාලීනව ශ්‍රී ලංකා ක්‍රිකට් සභාපති හා ලේකම්වරයාද අතර ඇතිවී ඇති මතවාදී ගැටුම් තුළ දෙපාර්ශ්වයක් නිර්මාණය වීම නිසා මෙම ගැටලු සහගත තත්ත්වය නිර්මාණය විය.
මෙම තත්ත්වය වර්ධනවීමට තවත් ප්‍රධාන හේතුවක් වූයේ පසුගියදා ක්‍රිකට් ලේකම්වරයාගේ බලතල බිඳ දමමින් ප්‍රධාන විධායක තනතුරට වැඩි බලතල දෙමින් නැවතත් සීතල යුද්ධයක් නිර්මාණය වීමය.
කෙසේ වුවත් මෙම තත්ත්වය තවදුරටත් පැවැත්වීම එළඹෙන එක්දින ලෝක කුසලානය සඳහා කණ්ඩායම ගොඩනැගීමට බාධාවක් ද වනු ඇත. මෙම ප්‍රශ්නයේම ප්‍රතිඵලයක් ලෙසට ජාතික ක්‍රිකට් පි‍ලේ ප්‍රධාන පුහුණුකරු පත්කිරීමේ අර්බුදයක් ද ඇතිවී නැවතත් එය විසඳාගැනීමේ සටනක නියැලීමට සිදුවී ඇත.
කොටසක් වත්මන් ක්‍රිකට් ප්‍රධාන පුහුණුකරු මාවන් අතපත්තු එයින් ඉවත්කොට ලෝක කුසලානයට විදෙස් පුහුණුකරුවකුගේ සේවය ලබාගැනීමේ අවශ්‍යතාවය පෙන්වන අතරේ තවත් කොටසක් දැනට අතපත්තු දේශීය පුහුණුකරුවකු ලෙස හොඳින් කාර්යය සිදුකරන නිසා ඔහු අඛණ්ඩව රඳවාගැනීමේ අදහසදක් ද ඇත.
කෙසේ වුවත් ක්‍රිකට් විධායක කමිටුවේද මේ වන විට අර්බුද නිර්මාණය වී පැවතීම තුළ පොදු තීරණයකට ඒම සඳහා විශාල බාධාවක් ඇතිවී ඇත
.පසුගිය කාලයේ ක්‍රිකට් ආයතනයේ දැඩි මූල්‍ය අර්බුදයක් පැවතීම, සේවක අතිරික්තය වැනි ගැටලු නිරාකරණය කිරීම සඳහා ක්‍රීඩා අමාත්‍යතුමා මූලිකව කටයුතු කළ ද තවමත් දෙපාර්ශ්වයේ මතගැටුම් සමථයකට පත්කිරීමට සම්පූර්ණ වශයෙන් නොහැකිවීම තුළ ක්‍රීඩා අමාත්‍යතුමා විසින් නැවතත් අතුරු කමිටු සංකල්පය මගින් ක්‍රිකට් පරිපාලනය එක් කිරීමට යන බවටද මේ වන විටත් ආරංචි පැතිරේ.
එසේ වුවහොත් නැවතත් ශ්‍රී ලංකා ක්‍රිකට් ආයතනයේ පරිපාලනය තවත් අතුරු කමිටුවක් වෙතින් පාලනය වනු ඇත.
කෙසේ වෙතත් ශ්‍රී ලංකා ක්‍රිකට් ක්‍රීඩාවේ වඩාත් තීරණාත්මක එක්දින ලෝක කුසලානයක් අතළඟ තිබියදී මෙම අර්බුදකාරී මුහුණුවරක් ක්‍රිකට් පාලනයේ තිබිම ශ්‍රී ලංකා ක්‍රිකට් හි අවාසියට හේතු වනු ඇත.
