වසර 10ක කාලයකදී තහනම් උත්තේජක භාවිතය වැලක්වීමට හා ක්‍රීඩා වෛද්‍ය විද්‍යාවට කරන ලද විශිෂ්ට සේවය පිළිබඳ සලකා ශ්‍රී ලංකාවට මේ ආරාධනාව පිළිගන්වා ඇත. වසර 2012දී ශ්‍රී ලංකාවේ පැවැති විස්සයි-20 ලෝක ක්‍රිකට් තරගාවලියේදී කැපී පෙනෙන මෙහෙවරක් මහාචාර්ය අර්ජුන ද සිල්වා මහතා ඇතුළු වෛද්‍ය මණ්ඩලය ඉටු කිරීමද මේ ආරාධනයට තවත් හේතුවකි.
තහනම් උත්තේජක පාලනයට සම්පාදනය කළ ආසියාවේ එකම රට ශ්‍රී ලංකාව වන අතර එහිදීද සිල්වා මහතාගේ දායකත්වය කැපී පෙනුණි.
ලන්ඩන් ඔලිම්පික් ක්‍රීඩා උළෙලේදීද විශේෂඥ භෞතචිකිත්සකයකු වූ මහාචාර්ය අර්ජුන ද සිල්වා මහතා ලෝක ක්‍රිකට් ක්‍රීඩා වෛද්‍ය සමුළුවේ ප්‍රධාන දේශකයා ලෙස සහභාගිවන පළමු ශ්‍රී ලාංකිකයාද වේ.
පස්වැනිවරටත් පැවැත්වෙන මේ සමුළුව ලෝක ක්‍රිකට් ශූරතාවලිය අතරතුරදී අන්තර්ජාතික ක්‍රිකට් සමුළුවේ සහයෝගය මත සංවිධානය වේ. මාර්තු 25වැනිදා ඇරැඹෙන මේ වෛද්‍ය සමුළුව 27වැනිදා දක්වා පැවැත්වීමට කටයුතු යොදා ඇත.
ලොව පුරා ටෙස්ට් වරම් දිනූ හා එම තත්ත්වය අපේක්ෂාවෙන් සිටින සියලු සාමාජික රටවල වෛද්‍ය විශේෂඥයින්, කායික වි‍ද්‍යාඥයින්, ශ්‍රාස්ත්‍රඥයින්, තෝරාගත් ගුරුවරු පිරිසක් හා සිසුන්ද මේ සමුළුවට සහභාගී වෙති.
ක්‍රිකට් ක්‍රීඩකයින්ට මුල් අවධියේ සිට ක්‍රීඩා සායනික කළමනාකාරිත්වය හා ක්‍රියාකාරිත්වය වැඩි කිරීමට අවශ්‍ය නිවැරදි ක්‍රමවේද පිළිබඳ මේ සමුළුවේදී සාකච්ඡා කෙරෙනු ඇත.
