මේ අනුව දැනට ක්‍රීඩා සංගම්වල තනතුරු දරණ සියලු නිලධාරීන්ට නැවැත නිලවරණ පැවැත්වෙන තුරු ධූර දැරීමේ හැකියාව ලැබෙනු ඇත.
නව තීරණයත් සමග දැනට භාරගෙන ඇති සියලු නාමයෝජනා අවලංගු වන අතර ක්‍රීඩා රෙගුලාසිවලට අනුකූලව නැවැත නාමයෝජනා කැඳවිය යුතු වේ.
ජාතික ක්‍රීඩා සංගම්වල ප්‍රධාන තනතුරු වසර 4ක් දැරූ අයට නැවැත පත්විය නොහැකි බවට ලැබුණු නීතිපති උපදෙස් වලින් අනතුරුව විවිධ මත පළවිය. ක්‍රීඩා පරිපාලනය අලුත් පිරිසකට භාරවිය යුතු යැයි කලක් තිස්සේ මත පළ කළ අතර එයට සෘජු ක්‍රියාමාර්ගයක් වත්මන් ක්‍රීඩා ඇමැතිවරයා ලබාගැනීම ක්‍රීඩාවේ යහපතට හේතුවක් වන බව ක්‍රීඩා අමාත්‍යාංශ ප්‍රකාශකයකු පැවැසීය.
එමෙන්ම ක්‍රීඩකයන් හා ක්‍රීඩා පරිපානයට සම්බන්ධ ඇතැම් අයද එකතැන පල්වෙන ක්‍රීඩාවට ජීවයක් ගෙන දෙන ලෙස ඉල්ලීම් කිරීම මේ තීරණයට බලපෑ හේතු බව එම ප්‍රකාශකයා අවධාරණය කළේය.
ක්‍රීඩා සංගම් ප්‍රධාන නිලතල වසර දෙකක් දැරූ අයට නැවැත එම තනතුරුවලට පත්වීමේ අවස්ථාව ක්‍රීඩා ඇමැතිවරයාගේ පූර්ව ලිඛිත අවසරය මත උදාකරගත හැකි අතර වසර 4ක් සිටි අයට එවැනි ලිඛිත අවසරයකින් හෝ ඉදිරිපත්වීමේ අවස්ථාව අහිමි වේ. ක්‍රීඩා සංගම් නිලවරණ මේ මස 31ට පෙර අවසන් විය යුතුව තිබුණද නව තීරණය අනුව මැයි මස 15ට පෙර නාමයෝජනා කැඳවා සති 6කින් නිලවරණ පැවැත්වීම අනිවාර්යය වේ.
dinamina
