'ක්‍රීඩා සංගම්වලට නිදහස ලබාදෙන්න කියා ජාත්‍යන්තරයේ ඉල්ලීමක් තිබෙනවා. ක්‍රීඩා අමාත්‍යවරයා ලෙස මම කැමැතියි එම සංගම්වලට පූර්ණ නිදහස ලබාදෙන්න.
නමුත් ඔවුන් විධිමත් ලෙස කටයුතු කරන්නේනම් පමණයි. මේ සංගම්වල මුදල් ගනුදෙනු නිසි අයුරින් කෙරෙන්නේ නෑ. ක්‍රීඩාවට ආදරය කරනවානම් මේ නිලධාරීන් අවංක විය යුතුයි.' ඇමැතිවරයා පැවැසීය. ක්‍රීඩා ඇමැති නවීන් දිසානායක මහතා මේ බව සඳහන් කළේ මහනුවර පල්ලෙකැලේ පළාත් සභා ශ්‍රවනාගාරයේ පසුගියදා පැවැති ජාතික කරාතේ දෝ උත්සවයට සහභාගි වෙමිනි. 'ක්‍රීඩා සමාජවල සාමාජිකයන්ගේ ඡන්දයෙන් පත්වුණු ක්‍රීඩා සංගම්වලට වැඩි වාසියක් තිබෙන බව අප කවුරුත් දන්නවා.
ඒ වගේම ක්‍රීඩා ඇමැතිවරයා හැටියට අතුරු කමිටු පත්කිරීම පිළිබඳ ප්‍රතිපත්තියක් වශයෙන් මම විරුද්ධයි. ක්‍රීඩක ක්‍රීඩිකාවන් ලෙස වැඩි අත්දැකීම් ඇති පුද්ගලයන් මේ සංගම්වල තනතුරුවලට පත්වෙන්නේ නම් මම කැමැතියි. මේවා කාගෙවත් බූදලයක් නෙවේ.' ඇමැතිවරයා වැඩි දුරටත් සඳහන් කළේය.
පල්ලෙකැලේ ක්‍රීඩාංගණය වැනි ක්‍රීඩාංගණවලින් උපරිම ප්‍රයෝජනය ගෙන ජාත්‍යන්තර තලයට යා හැකි ක්‍රීඩක ක්‍රීඩිකාවන් පිරිසක් බිහි කිරීමට කටයුතු කළ යුතු බව ද ඇමැතිවරයා මෙහි දී පෙන්වා දුන්නේය.
dinamina
