ඔහු පවසා ඇත්තේ මෙම කරුණු තමන් බ්ලාගොවෙස්චෙන්ස්ක් සිටි මොන්ගෝලියාවේ උලාන් බටෝර් වෙත ගමන් කරන අතරතුරදී කෙටුම්පත් කළ බවයි.
ඒ අනුව මුලින්ම ඩොනෙට්ස්ක් සහ ලූගාන්ස්ක් ප‍්‍රදේශයන් වල මිලිෂියා භටයින් විසින් ප‍්‍රදේශ අත්පත් කරගැනීම සඳහා සිදුකරන මෙහෙයුම් නැවැත්විය යුතු අතර ජනාවාස වලට ෂෙල් ප‍්‍රහාර එල්ල කළ නොහැකි දුරක් දක්වා කියෙව් හමුදාවන් පසුබැසිය යුතු බව පුටින් යෝජනා කර තිබේ.
ඉන්පසු සටන් විරාම නිරීක්ෂණය සඳහා පූර්ණ ජාත්‍යන්තර මෙහෙයුමක් සිදුකළ යුතු බව ඔහුගේ අදහසයි.
සිවිල් වැසියන් සහ ගම්මාන ඉලක්ක කර ගුවන් ප‍්‍රහාර එල්ල කිරීම නැවැත්විය යුතු වන අතර පූර්ව කොන්දේසි රහිතව සිරකරුවන්/රැඳිවියන් හුවමාරු කරගත යුතු බව ඔහුගේ යෝජනාවයි.
සරණාගතයින්ට ආරක්ෂිත ප‍්‍රදේශ කරා යාමට මාර්ග සැකසිය යුතු අතර ඩොනෙට්ස්ක් සහ ලූගාන්ස්ක් ප‍්‍රදේශ අතරින් මානුෂීය ආධාර ගෙනයාම රුසියානු ජනාධිපතිවරයාගේ මීළග යෝජනාවයි.
විනාශවූ සමාජයීය යටිතල පහසුකම් පිළිසකර කිරීම සඳහා ආධාර රැගත් කණ්ඩායම් යෙදවීම එම සැලැස්මේ අවසන් කරුණ වශයෙන් දක්වා තිබේ.
කෙසේවෙතත් යුක්රේන අගමැති ආර්සෙනි යට්සෙන්යුක් පවසා ඇත්තේ රුසියානු හමුදාවන් යුක්රේනයෙන් ඉවත් වන්නේ නම් සාමය සඳහා එයම ප‍්‍රමාණවත් වනු ඇති බවයි.
