එහෙත් එහි බහුතරය වික්‍රමසිංහගේ හිතවතුන් වීම මත සජිත් ප්‍රේමදාසට හෝ කරූ ජයසුරියට අවස්ථාවක් ලැබීමේ හැකියාව අවමය. රනිල් වික්‍රමසිංහ ජනාධිපතිවරණයට ඉදිරිපත් වීම සඳහා තමාගේ ඇති කැමැත්ත මේ වන විට එජාප ජේෂ්ට නායකයන්ට දැනුම් දී තිබෙන බවත් දැන ගැනීමට ඇත. එමෙන්ම සජිත් ප්‍රෙමදාස වෙනුවෙන් පෙනී සිටින මංගල සමරවීර හා එම කණ්ඩායමට සහ කරූ ජයසූරිය වෙනුවෙන් පෙනී සිටින රවී කරුණානයක සහ පිරිසට එම මෙහෙයුම් නතර කරන ලෙසට පණිවිඩය ලබා දී ඇති බවත් එම ආරංචි මාර්ග පවසයි.
පසුගියදා එජාප පසුපෙළ මන්ත්‍රීවරුන් කණ්ඩායම් වශයෙන් රනිල් වික්‍රමසිංහ මුණ ගැසී ජනාධිපතිවරණයට ඉදිරිපත් නොවන ලෙසත් පක්ෂයේ ජනප්‍රියම නායකයා වන සජිත් ප්‍රේමදාසට ඒ සඳහා අවස්ථාව ලබා දිය යුතු බවත් පවසා තිබිණි. එහෙත් වික්‍රමසිංහ ඊට එකඟව තිබුණේ නැත.
වික්‍රමසිංහ ජනාධිපතිවරන අපෙක්ෂකයා ලෙස ඉදිරිපත් වන්නෙ නම් පක්ෂ හා කණ්ඩායම් ගනනාවකගේ සහය ඔහුට හිමිවනු ඇති බවත් ඒ අනුව පුළුල් සන්ධානයකින් පොදු අපෙක්ෂකයකු ලෙස ඔහුට ඉදිරිපත් වීමේ අවස්ථාව ඇති බවත් වික්‍රමසිංහ පාර්ශ්වයේ මතය වී තිබේ. විශේෂයෙන්ම මෙවර ජනාධිපතිවරණයේ තීරණාත්මක සාධකය වන මධ්‍යම පාංතික ජනතාවගේ පාවෙන ඡන්ද කෝටාව ලබා ගැනීමේ හැකියාව ඇත්තේ වික්‍රමසිංහ ට බවද ඔවුන්ගේ මතයයි. සජිත් ප්‍රේමදාසට එජාපයෙන් ඈත්ව සිටින පිරිස යම් පමණකට යළි එක්කර ගැනීමේ හැකිවාවක් තිබුණද මධ්‍යම පාංතික ජනතාව ආකර්ෂණය කර ගැනීමේ හැකියාවක් නොමැති වීමත්. කරු ජයසූරිය සම්බන්ධයෙන්ද එවැනි ප්‍රසදයක් නොමැති වීම හා ඔහුගේ වයොවෘද්ධ භාවයත් සලකා බැලීමේදි වික්‍රමසිංහ ට තව දුරටත් වාසි සහගත තත්වයක් පවතී. එසේම පසුගියදා ආණ්ඩුවට එරෙහිව ජවිපෙ ඉදිරිපත් කළ විශ්වාසභංග යෝජනාව පහසුවෙන් පරාජය කිරීමට හැකිවීම තුල රනිල් වික්‍රමසිංහගේ නායකත්වය තවදුරටත් ශක්තිමත් වීමද සිදුව තිබේ.
කෙසේ නමුත් එජාපයේ පාර්ලිමේන්තු කණ්ඩායමේ බහුතරයේ මතය වී ඇත්තේ සජිත් ප්‍රේමදාස ජනාධිපතිවරණ අපේක්ෂකයා ලෙස ඉදිරිපත් කළ යුතු බවය. පක්ෂ නායක රනිල් වික්‍රමසිංහ ට තව දුරටත් පක්ෂ නායකත්වයේ සිටීම අවශ්‍ය නම් එජාපයේ ව්‍යවස්ථාව වෙනස් කර ඒ සඳහා අවස්ථාව ලබා දීමටද එම කණ්ඩායමේ වැඩි පිරිසක් එකඟ බවද එජාප ආරංචි මාර්ග පවසයි.
