පෙබරවාරි මාසයේ සංචාරක ඉපැයීම් ඩොලර් මිලියන 345.7 ක් වූ අතර එය පසුගිය වසරේ අනුරූප කාලයට වඩා 118.2% ක වර්ධනයක් පෙන්නුම් කරන බව ඊයේ නිකුත් කළ නවතම මහ බැංකු දත්ත පෙන්වා දෙයි. මාසිකව සැසඳීමේදී පවා, පෙබරවාරි ඉපැයීම් 2024 ජනවාරියට වඩා 1.14% වැඩිය. එය 2020 සිට සටහන් වූ ඉහළම ඉපැයීම් වේ.

පළමු මාස දෙක තුළ සංචාරකයින් 426,603 ක් රට තුළට පැමිණ ඇති අතර, එය මෙම වසර සඳහා ධනාත්මක ආරම්භයක් ඇති කළේය. වසර අවසානය වන විට නියමිත ඉලක්ක සපුරා ගැනීම සඳහා වත්මන් සුබවාදී ගම්‍යතාව පවත්වා ගැනීම අත්‍යවශ්‍ය බව මහබැංකුව පෙන්වා දෙයි.

2024 වසර සඳහා ශ්‍රී ලංකා සංචාරක ව්‍යාපාරය මිලියන 2.3ක සංචාරක පැමිණීම් සහ ඩොලර් බිලියන 4කට අධික ආදායමක් ලබාගැනීමට සූදානමින් සිටී.

මේ අනුව අඛණ්ඩව මාස තුනක කාලය තුළ මාසයකට ශ්‍රී ලංකාවට සංචාරකයින් 200,000කට අධික ප්‍රමාණයක් බැගින් පැමිණ ඇත. 2020 මාර්තු මාසයේදී කොරෝනා වසංගතය ආරම්භ වූ දා සිට දෙසැම්බර් මාසයේදී වාර්තා වූ 210,352 හි පෙර ඉහළම අගය අභිබවා යමින් පෙබරවාරි පැමිණීම් ද ඉහළ ගොස් ඇත.

2020 සහ 2021 වසංගත කාලය, දේශපාලන අස්ථාවරත්වය සහ ආර්ථික අර්බුද, අහිතකර ගෝලීය තත්වයන් ජයගෙන ශ්‍රී ලංකාවේ සංචාරක කර්මාන්තය එහි ඔරොත්තු දීමේ හැකියාව නැවත ඔප්පු කර 2023 දී ශක්තිමත් කරගැනීමට සමත් විය.

සංචාරක කර්මාන්තයේදී නැවත විදේශ මුදල් පිටතට ගලායාම අවම වන බැවින් සංචාරක ව්‍යාපාරය රට සඳහා ශුද්ධ විදේශ මුදල් ඉපැයීමේ වැදගත් මූලාශ්‍රයක් ලෙස පවතී.

මහ බැංකු දත්තවලට අනුව 2014 සහ 2019 අතර කාලය තුළ සංචාරක ව්‍යාපාරය මුළු විදේශ මුදල් ඉපැයීම්වලින් 14%කට පමණ දායක වී ඇත. අවාසනාවකට, සංචාරක අංශයේ ඉපැයීම්වලින් පසුගිය වසර හතර තුළ බහුවිධ අභියෝග මධ්‍යයේ ශ්‍රී ලංකාවට ඩොලර් බිලියන 15ක් පමණ අහිමි විය.