පසුගිය සමයේදී ශ්‍රීලනිපක්ෂය පක්ෂය මහින්ද රාජපක්ෂගේ පුද්ගලික අවශ්‍යතා මත පක්ෂ ප්‍රතිපත්ති ක්‍රියාවට නැංවීම හේතුකොටගෙන පක්ෂය බරපතළ අර්බුදයකට ලක් වී තිබිණි.
ඉදිරි මැතිවරණවලදී ශ්‍රීලනිප අනෙකුත් පක්ෂ සමඟ කටයුතු කරන ආකාරය මෙන්ම පක්ෂයෙන් ඉවත් වූ සුළු ජාතිකයන් පක්ෂයට ආකර්ෂණය කර ගැනීම වෙනුවෙන් විශේෂ ක්‍රියාමාර්ග රැසක් සැලසුම් කර ක්‍රියාත්මක කිරීමටද මෙම කමිටුවට පැවරී ඇත.
මේ අතර හිටපු ජනාධිපති මහින්ද රාජපක්‍ෂ මහතා මීළඟ මහ මැතිවරණයේදී අගමැති අපේක්‍ෂකයා කළ යුතු බවට පවසමින් මහනුවර දී පැවැති ජනරැලිය සඳහා සහභාගී වූ ශ්‍රී ලංකා නිදහස් පක්ෂ මහජන නියෝජිතයන්ට එරෙහිව විනය ක්‍රියාමාර්ග ගැනීමට එම පක්ෂය තීරණය කර තිබේ.
ශ්‍රී නිදහස් පක්ෂයේ සභාපති ජනාධිපති මෛත්‍රීපාල සිරිසේන මහතා විසින් පක්ෂ මහ ලේකම්වරයා වෙත මෙම උපදෙස් ලබා දී ඇතැයි එහි මාධ්‍ය ප්‍රකාශක, පාර්ලිමේන්තු මන්ත්‍රී ඩිලාන් පෙරේරා මහතා පැවැසීය.
පක්ෂයේ අනාගතය ආරක්ෂා කර ගැනීම වෙනුවෙන් මෙම විනය ක්‍රියාමාර්ගය ගැනීමට අපේක්ෂා කරන බව ඒ මහතා කීවේය. මෙම රැළියට සහභාගී වීමෙන් එම මහජන නියෝජිතයන් පක්ෂයේ මධ්‍යම කාරක සභාව ගත් තීරණය උල්ලංඝණය කර ඇති බවද පෙරේරා මහතා ප්‍රකාශ කෙළේය.
