මහා පරිමාණ සහ සුළු පරිමාණ කැසිනෝ හල්, තුරඟ තරග සූදූ පොළවල් , සමාජ ශාලා දහසකට වැඩි ප්‍රමාණයක් රට පුරා තිබෙන අතර ඒවායින් වැඩි ප්‍රමාණයකට බලපත්‍ර නොමැතිව පවත්වාගෙන යන බවට පොලිසියට තොරතුරු ලැබී තිබුණි. ඒවා පරීක්ෂා කර බලපත්‍ර පිළිබඳ සොයා බැලීමට පොලිස්පති එන්. කේ. ඉලංගකෝන් මහතාගෙන් ලැබුණු උපදෙස් මත මෙම පරීක්ෂා කිරීම සිදුවෙයි.
මේ අතර දෙමටගොඩ ප්‍රදේශයේ රාත්‍රී සමාජ ශාලාවක්‌ හා ගල්කිස්‌ස ප්‍රදේශයේ ප්‍රසිද්ධ කැරොකේ රාත්‍රි සමාජ ශාලාවක්‌ කොළඹ සුරාබදු විශේෂ මෙහෙයුම් ඒකකය විසින් 17 දා වටලන ලදී.
සමාජ ශාලාවක බලපත්‍ර කොන්දේසි කඩකිරීම් සම්බන්ධ චෝදනා මෙන්ම තීරු බදු නොගෙවන ලද විදේශ මත්පැන් ළඟ තබා ගැනීම අනවසර මත්පැන් පීඨිකා පවත්වාගෙන යාම වැනි චෝදනා දෙමටගොඩ සමාජශාලාවට එරෙහිව ගොනුකර ඇති බව කොළඹ සුරාබදු විශේෂ මෙහෙයුම් ඒකකය පවසයි.
ගල්කිස්‌සේ මේ සමාජ ශාලාවට බලපත්‍රයක්‌ තිබී නැති අතර එහිදී මත් පැන් තොගයක්‌ සමග අත්අඩංගුවට ගත් සැකකරු ගල්කිස්‌ස මහෙස්‌ත්‍රාත් අධිකරණයට ඉදිරිපත් කරන බව විශේෂ මෙහෙයුම් ඒකකය සඳහන් කරයි.
