ඔහුගේ ලැයිස්තුව අනුව එජනිස හා එජාපයේ අපේක්ෂකයන් ගණනාවකට මත්ද්‍රව්‍ය චෝදනා එල්ල වූයේය. එජාපය සිය ලැයිස්තු සකස් කිරීමේදී එම නම් ඉවත් කළ බව පසුගියදා විජේදාස රාජපක්ෂ ඇමතිවරයා පවසා තිබුණි.එජනිසය ඇතැම් මන්ත‍්‍රීවරුන් කපා හැරීමට ඔවුන් කටයුතු කර තිබුණි.ඒ අනුව බොහෝ අයෙකුට වෛද්‍ය නිලංගගේ හෙළිදරව්ව ප‍්‍රයෝජනයක් වූයේය.
වෛද්‍ය නිලංග සමරසිංහ මහතා ගේ රාගම නිවසට අවස්ථා දෙකකදී යතුරුපැදියකින් පැමිණ තර්ජනය කිරීම සම්බන්ධයෙන් ඔහු රාගම පොලිසියට පැමිණිලි කර ඇතත් ඒ සම්බන්ධ සැකකරුවන් මෙතෙක් අත්අඩංගුවට ගෙන නොමැත.
මේ තත්වය සම්බන්ධයෙන් අවධානය යොමුකර තමාට ආරක්ෂාව ලබාදෙන ලෙස ඔහු පොලිස්පතිවරයාගෙන් හා මහජන සාමය පිළිබඳ අමාත්‍යාංශයෙන් ඉල්ලීමක් කර ඇතත් ඊයේ (19 ) වනතෙක් ආරක්ෂාවක් ලැබී නැත.
කෙසේ නමුත් මත්ද්‍රව්‍ය නිවාරණය සම්බන්ධව කටයුතු කරණ ආයතනයක සභාපතිවරයාට මෙවන්වූ තර්ජනයක් එල්ලවීමේදී ඔහුට ආරක්ෂාව සැපයීමට නොහැකි නම් මත්දව්‍ය වලින් තොර රටක් උදෙසා පියවර ගන්නේ කෙසේද යන්න ගැටලුවක්වේ. මැතිවරණය හමුවේ වෛද්‍ය නිලංග සිදු කළ මෙම හෙළිදරව්ව බොහෝ දේශපාලකයන්ට එල්ලකළ මරු පහරක් වූයේය.ඒ පහරින් සිත් රිදවා ගත් දේශපාලකයන් දැන් වියරුවැටී වෛද්‍ය නිලංග පසුපස හබායාමට ඉඩ දී බලා සිටිය හැකිනම් එය මත්ද්‍රව්‍ය ජාවාරම්කරුවන්ගේ අණසකට යටත් වීමකි.ඒ නිසා ඉක්මනින්ම පරක්ෂණ පවත්වා තර්ජනය කළ පුද්ගලයින් සොයා ගත යුතුය.ඒ සදහා ඔවුන්ව පෙළඹවූ ලොකු අතු පාත් කර ගත යුතුය.
මත්ද්‍රව්‍ය ජාවාරම්කරුවන්ගේ බලය පැවැත්වූ යුගය කෙසේ හො හමාර කර ගත යුතුය.මේ රට ඔවුන්ගේ අණසකට යටත් කර ගැනීමට ඉඩනොදිය යුතුය.නීති විරෝධී මත්ද්‍රව්‍ය ජාවාරම්වල කිසියම් දේශපාලනඥයෙක් නිරත වනවා නම් සහ ඉදිරියේදී නිරත වුවහොත් පක්ෂ, පාට, තරාතිරම නොබලා ඔහුට එරෙහි ව ගත හැකි සෑම නීතිමය පියවරක්ම ගන්නා බවද ජනාධිපතිවරයා පසුගිය දිනක පැවසුවේය.එය එසේම සිදුවන තෙක් අප බලා සිටිමු.
කෙසේ වෙතත් අන්තරායකර ඖෂධ පාලක මණ්ඩලයේ සභාපති වෛද්‍ය නිලංග සමරසිංහ මෙවර මහ මැතිවරණයට තරග වදින අපේක්ෂකයන් සහ ඔවුන්ගේ පවුල්වල අය, එතනෝල්, මත්ද්‍රව්‍ය හෝ ඊට අදාළ වෙනත් විෂමාචාර ක්‍රියාවලට සම්බන්ධදැයි පරීක්ෂා කොට අදාළ නිර්දේශ පක්ෂ නායකයන්ට ඉදිරිපත් කිරීමට කටයුතු කිරීමේ වැඩපිළවෙල ඇගයීමට ලක්කළෙමු.දැන් ඒ වැඩපිළිවෙල නිසා ඔහුට තර්ජන එල්ල වෙදීදී ඔහු වෙනුවෙන් ආරක්ෂාව අවැසි බව මතක් කර දීමට සිදුවීම කණගාටුදායක තත්වයකි.
සබැදි පුවත්
අපේක්ෂකයන්ට කුඩු - එතනෝල් පරීක්ෂණයක්!
අද අපේ සිහිනය හෙට රටේ නීතිය
