මින්පෙර අයි එස් සංවිධානය හා සම්බන්ධ ශ්‍රී ලාංකිකයින් පිළිබඳ තොරතුරක් මාධ්‍ය වාර්තා මගින් ප්‍රසිද්ධව තිබුණේ නැත. එමෙන්ම ඊයේ දිනයේ අප සොයා බලන විට වෙනත් කිසිදු පිළිගත හැකි තොරතුරු මූලාශ්‍රයක් හෝ ප්‍රවෘත්ති ඒජන්සියක් මේ පිළිබඳ වාර්තා කර තිබුනේ ද නැත.
ඒ අතර ම ඊයේ ශ්‍රී ලංකාව සහ පාකිස්ථානය අතර ආර්. ප්‍රේමදාස පිටියේ පැවති එක්දින ජාත්‍යන්තර ක්‍රිකට් තරඟය අතර තුර ප්‍රේක්ෂාගාරයේ ඇතිවූ ගැටුමක් දුර දිග යාම හේතුවෙන් තරඟය අතරමඟ නැවතීමට සිදුවිය. ගැටුමෙන් ක්‍රීඩාපිටිය වෙතද ගල් ප්‍රහාරයක් එල්ල වූ බව වාර්තා වූ අතර පිටියෙන් පිටතට ඇවිළුණු ගැටුමෙන් වාහන කිහිපයක් ද ගිනිබත් වුණු බව වාර්තා විය. ජාත්‍යන්තර ක්‍රිකට් තරඟයන්හිදී ජයපරාජය දරාගැනීම සම්බන්ධයෙන් බරපතළ සිදුවීම් එතෙක් වාර්තා නොකළ ශ්‍රී ලංකාව මේ සිදුවීමත් සමඟ මහත් අපකීර්තියක් අත්කරගත් අතර ගැටුම සිංහල - මුස්ලිම් වර්ගවාදී ස්වරූපයෙන් වර්ධනය වුවහොත් එය ඉතාම ඛේදජනක ප්‍රතිඵල අත්කරදෙනු නියතය.
ඉහත සිදුවීම් දෙක අතර සම්බන්ධතාවක් ඇතැයි සෘජුව සැක පහළ කිරීමට හේතූන් නැතත් සිංහල - මුස්ලිම් ගැටුමක් අවුළුවා එමඟින් දේශපාලන වාසි ලැබිය හැකි පාර්ශ්වයන් මේ මොහොතේ සිටින බව මඟ හැරිය නොහැකි සත්‍යයකි. මින් සිංහල සහ මුස්ලිම් අන්තවාදී දේශපාලන සංවිධාන දෙපිරිසම වාසි ලබනු ඇත, එක් ජාතිවාදයක වර්ධනය එහි ප්‍රතිවිරුද්ධ ජාතිවාදයෙහි වර්ධනයට උත්ප්‍රේරකයක් වන නිසා දෙපිරිසම තම තම ජාතියෙහි අනුගාමී පිරිස් අතර බලවත් වනු ඇත.
සංඛ්‍යාත්මක වශයෙන් බහුතර ජාතියෙහි වර්ගවාදී කොටස සාපේක්ෂව වැඩි වාසියක් අත්කර ගනු ඇත. විශේෂයෙන් මහමැතිවරණයක් කැඳවා ඇති මෙන්ම ගියවර ජනපතිවරණයෙන් පරාජය වූ අපේක්ෂකයා යළි මෙම මැතිවරණයට විපක්ෂයෙහි ප්‍රධානතම අපේක්ෂකයකු වශයෙන් ඉදිරිපත්ව ඇති මොහොතක මැතිවරණ වාසි වෙනුවෙන් මෙවන් සිදුවීම් භාවිතා වීම නොවැලැක්විය හැක්කකි. ඒ, මහින්ද රාජපක්ෂ මහතා මීට පෙර ප්‍රසිද්ධියේ බොදුබල සේනාවට කුමන්ත්‍රණයකැයි දොස් පැවරුවද ඔහුගේ මුළු මැතිවරණ ව්‍යාපාරයෙහිම මූලික පදනම සිංහල මහජාතිවාදයට ඇමතීම බව ඔහු පළමු රැළියෙන්ම පසක් කළ නිසාය. මුස්ලිම් විරෝධයක් ඇවිළීම සිංහල ජාතිවාදී පාර්ශ්වයෙහි සැකය හා බිය වඩවා ඔවුන් වෙත ගැළවුම්කරුවෙකු ලෙස පෙනී සිටීමට සැලසීමේ ඉඩ ඔහුවෙත විවර කරනු ඇත.
අපි ජාතිවාදී වියරුවකින් දීර්ඝ කාලයක් පීඩා වින්දෙමු. නැවත එවැන්නක් කිසිවකුට වුවමනා නැත. පටු දේශපාලන වාසි වෙනුවෙන් මෙවන් සිදුවීම් ඇතිකරන්නන් හෝ භාවිතා කරන්නන් පිළිබඳ සැලකිලිමත් විය යුතු අතර ඔවුන් දේශපාලන භූමියෙන් පිටුදැකීමටද පියවර ගත යුතුය. මෙකී සිදුවීම් කෙරෙහි මෙම සැක මුසු කරුණු පෙළගැස්ම අප ප්‍රශ්න කර සිටින්නේ සාමකාමී රටක අනාගතය වෙනුවෙනි.
සුනිත් අරුණශාන්ත
