ජිනීවා සමුළුවේදී ලංකාවට යුද අපරාධ චෝදනා එල්ල කළහොත් ඊට සැප්තැම්බර් මාසයේදී පිළිතුරු ලබාදෙන බව කී ඇමැතිවරයා යුද්ධයේදී සිදුවූ සැබෑ සිද්ධීන් වලදී ආණ්‌ඩුව පෙනී සිට සියලු දෙනා බේරාගන්නා බවද කියා සිටියේය.
එහෙත් යුද්ධයට මුවාවී විවිධ අපරාධ, මිනී මැරුම් කළ හෝ කිරීමට අණදුන් කිසිවකු වෙනුවෙන් පෙනී නොසිටින බවද ඇමැතිවරයා කීය.
යුද්ධයට මුවා වී කළ අපරාධ බොහෝය. වෙනෙකක් තබා රාජිත සේනාරත්න පවා වරක් මන්ත්‍රීධුරය අහිමි කරගත්තේ හමුදාවට බිස්නස් කරන්නට ගොසිනි. ජිනීවා සමුළුව යනු යකෙක් රකුසෙක් නොවේ. මහින්ද රාජපක්ෂම වරක් වාසුදේව නානායක්කාර සමඟ ගොස් බිම හිඳගත් තැනකි.
එදා විජේදාස ලියනාරච්චි ඇතුළු තරුණයින් මරා දැමීමට සහය දී පසුව ජිනීවා ද ගිය මහින්ද අද අධිරාජ්‍යවාදී කුමන්ත්‍රණ ගැන කීම සාහසික විහිළුවකි. මහින්දගේ දේශපාලනය යනු ප්‍රතිපත්තියක් නැතිකමයි. වරෙක මානව හිමිකම්ද වරෙක යුධ විරෝධයද වරෙක යුද්ධයද වරෙක මානව හිමිකම් විරෝධයද අවුළන්නේ එබැවිනි.
බලය සහ බලයෙන් ලද ප්‍රයෝජන මිස කිසිවකුත් වැදගත් නොවන්නා වූ රාජපක්ෂ්ට කබරගොයා තලගොයා කිරීමේ අවස්ථාව නොදිය යුතුය. එමන්ම රාජපක්ෂ විසින් ඇඟිල්ල දිගු කෙරෙන්නා වූ හොරුන්ට පවා සාධාරණ පරීක්ෂනයකට මුහුණ දී තම නිවැරදි භාවය ඔප්පු කළ හැකි යාන්ත්‍රණයක් තැනිය යුතුය.
මෛත්‍රී පාරමිතාව පිරීම සකල දෝශ නිවාරණය කරන්නා වූ ශාන්ත්කර්මයක් නොවිය යුතු අතර රාජපක්ෂලා සමඟ එකගෙයි කෑ, අද පව් සෝදනවා යැයි කියන අයටද දඬුවම් ලැබිය යුතුය.
