කෙසේ නමුත් මෙම මාධ්‍ය හමුව ආරම්බවන විට 9.30 ද පසුවූ අතර එම වාර්තාකරුවන් පිරිස අමතා විනාඩි දෙකක කාලයක් පමණක් රාජපක්ෂ මහතා කතා කර තිබේ. අනතුරුව ප්‍රශ්න ඇසීමේ වාරය පැයක පමණ කාලයක් පවත්වා ‍රැස්වීම විසුරුවා ඇත.

සුසිල් ප්‍රේමජයන්ත, අනුර ප්‍රියදර්ශන යාපා, විමල් වීරවංශ, උදය ගම්මන්පිල, ටිරාන් අලස්, ජී.එල් පීරිස් ඇතුළු පිරිසක්ද මෙම අවස්ථාවට එක්ව සිටියහ.

මෙම අවස්ථාවේදී එක්සත් ජනතා නිදහස් සන්ධනාය වටා එක් රොක්වන ජනතාව දිනෙන් දින ඉහළ යමින් පවතින බව හිටපු ජනාධිපති මහින්ද රාජපක්ෂ මහතා පවසා ඇත.

මාධ්‍යවේදීන්ගේ ප්‍රශ්නවලට පිළිතුරු දෙමින් හිටපු ජනාධිපතිවරයා කියා සිටියේ 2005දී අපි බාරගත් රට නොව 2015දී අපි බාරදුන්නේ යනුවෙනි.

ඉදිරි මැතිවරණයෙන් ආසන 117ක බහුතර බලයක් ගන්නා බව විශ්වාස යැයිද අනිවාර්‍ය‍යයෙන්ම ආසන 113ට වඩා ගන්නා බවද හෙතෙම කීවේය.

එල්.ටී.ටී.ඊයට මුදල් ලබාදුන් බවට චෝදනාවක් තිබෙනවා නේදැයි ඇසූ ප්‍රශ්නයට හිටපු ජනාධිපතිවරයා පැවසුවේ කොටින්ට අවි ආයුධ දුන්නේ කවුදැයි හොඳට දන්නා බවයි.

කොටි සමග සාකච්ඡා කළේ නැති බවත්, එම සාකච්ඡාවලට තමන් නොගිය බවත්, යැවුවේ වෙනත් අය බවත්, හිටපු ජනපති පිළිතුරු ලෙස කියා සිටියේය.

අපි කළේ ආයෝජකයින් ගෙන්වා පතාලය යැවීම බවත්, වත්මන් රජය සිදුකර ඇත්තේ පාතාලය ගෙන්වා ආයෝජකයින් යැවීම බවත්, හිටපු ජනාධිපති මහින්ද රාජපක්ෂ මහතා එහිදී කියා සිටියේය.

වසීම් තජුඩීන්ගේ මරණය ගැන මාධ්‍යවේදියෙකුගේ ප්‍රශ්නයකට හිටපු ජනාධිපතිවරයා කියා සිටියේ එම පරීක්ෂණය ඇත්ත පරීක්ෂණයක් ලෙස කළ යුතු බවයි.

ඊට විමල් වීරවංශ මහතාද පිළිතුරු ලබාදීමට එක්විය.

මෙතුවක් කාලයක් “හොරා” කියමින් සිට ඡන්ද තුරුම්පුවක් ලෙස “මිනීමැරුවා” යැයි කීමේ සැලසුමක් මෙම සිද්ධියෙන් පැහැදිලි වන බව ඔහු කියා සිටියේය.

ඇතැම් අවස්ථාවලදී තමාට වැරදුණ බවත්, හිටපු ජනාධිපතිවරයා පැවසූ අතර එසේ වැරදුණු අවස්ථා මොනවාදැයි මාධ්‍යවේදීන් විමසන ලදී.

සජිත් ප්‍රේමදාස මහතාගේ නංගි කෙනෙක් ව්‍යාජ මුදල් සමග අසුවූ අවස්ථාවේ කළ මැදිහත්වීම හිටපු ජනාධිපතිවරයා සිහිපත් කළේය.

මේ අතර වත්මන් ජනපති මෛත්‍රිපාල සිරිසේන මහතා සමග සහයෝගයෙන් වැඩ කිරීමට සුදානම් බවද මහින්ද රාජපක්ෂ මහතා එහිදී කියා සිටියේය.

යළි ජ්‍යොතිෂ්‍ය විශ්වාස කරනවාදැයි විමසූවිට නෑ මම විශ්වාස කරන්නේ නෑ යනුවෙන් හිටපු ජනාධිපතිවරයා සිනාමුසු මුහුණින් පිළිතුරු දුන්නේය.