විමල් වීරවංශ මහතා සන්ධානයෙන් ඉවත් වී මහින්ද රාජපක්ෂ මහතාව ඉදිරියෙන් තබාගෙන වෙනම දේශපාලන ගමනක් යෑමට සූදානම් වෙමින් සිටියද ඒ වෙනුවෙන් රාජපක්ෂ පවුලේ දැඩි විරෝධය එල්ල වී ඇත. මේ අතර වීරවංශ මහතාගේ සැලසුම විපක්ෂ නායකධුරය ලබා ගැනීම වුවත් එයට ශ්‍රී ලනිපයේ ද විරුද්ධත්වය පලවී ඇත. එනමුත් මහින්ද රාජපක්ෂ මහතා විපක්ෂයට වී ආණ්ඩු විරෝධී ප්‍රදර්ශනකාමී දේශපාලනයක නිරත වීමෙහි දැඩි කැමත්තකින් පසුවන බවත් අවස්ථාවල ලද හොත් හිරබත් කෑමට වුව සූදානමින් ඔහු සිටින බවත් දැන ගැනීමට තිබේ. (ඇතැමුන් කියන්නේ තවත් අලෙවි මවුලානා කෙනෙකු මෙරට දේශපාලනයට එකතුවනු ඇති බවය.) රාජපක්ෂ මහතාට ඇති විශාලම ගැටලුව වී ඇත්තේ යෝෂිත රාජපක්ෂට එරෙහිව එල්ලවෙමින් පවතින තාජුඩීන් ඝාතන චෝදනාවය. ඔහු ආණ්ඩුවට මෙල්ලවී සිටින්නේ එම හේතුව නිසා බවද දැනගැනීමට තිබේ.
කෙසේ නමුත් දෙමළ ජාතිකයකුට විපක්ෂ නායකධුරය යෑම වලක්වා ගැනීමේ වුවමනාවත්, වීරවංශ මහතට එම අවස්ථාව ලබාදීම වැලැක්වීමෙත් වුවමනාව මත ව්‍යාජ විපක්ෂයක් තනා ගැනීම වෙනුවෙන් සන්ධානයේ හා ශ්‍රී ලංකා නිදහස පක්ෂයේ දෙකඩ වීමක් ශ්‍රී ලනීපය, සැලසුම් කර ඇත.
වීරවංශ මහතාට විපක්ෂ නායකධුරය ලබා දීම වැලැක්වීම සඳහා ශ්‍රී ලංකා නිදහස් පක්ෂයේ පිරිසක් වෙනම කණ්ඩායමක් ලෙස විපක්ෂයට එක්වී එම තනතුර මෛත්‍රීපාල සිරිසේන මහතාට පාලනය කර ගත හැකි පුද්ගලයකු වෙත ලබා දියයුතු බව ශ්‍රී ලනීපයේ ඇතැම් ජේෂ්ඨයකුගේ අදහස් වී තිබේ.
තව වසර දෙකකදී ජාතික ආණ්ඩුවෙහි කාලය අවසන් වීමෙන් පසුව ශක්තිමත් විපක්ෂයක් ලෙස හෝ ආණ්ඩු බලය දිනා ගැනීම වෙනුවෙන් හෝ ශ්‍රී ලනීපය සූදානමින් තබා ගත යුතු බව ජනාධිපතිවරයාගේ ද අදහස වී ඇති බව ශ්‍රී ලනීප ජේෂ්ඨයන් පවසති.
මෙහිදී තවත් දේශපාලන අනාගතයක් නොමැති මහින්ද රාජපක්ෂ මහතා හා ඔහුගේ කණ්ඩායම විපක්ෂයට එක්වී කටයුතු කිරීමෙහි ද ගැටළුවක් නොමැති බවද ශ්‍රී ලනීප ජේෂ්ඨයන්ගේ මතය වී තිබේ. එමඟින් එජාපයේ යම් ක්‍රියාකාරකම් පාලනය වනු ඇති බවත් ඔවුන් පෙන්වා දී ඇත.
එමෙන්ම ඉදිරි වසර පහ තුලදී ශ්‍රී ලනීපය වඩා ශක්තිමත් ප්‍රතිපත්තිගරුක පක්ෂයක් ලෙස ගොඩ නැගීමට ජනාධිපතිවරයාට කාලය ඇති බවත් ඔවුන් පෙන්වා දෙයි.
