මෙම බාධාවන් නිසා මෙම පරීක්ෂණ කටයුතු ඉදිරියට නොකෙරෙනු ඇති බවට පැතිර යන ආරංචි හේතුවෙන් අප කළ විමසීමකදී එම දෙපාර්තමේන්තු වේ ඉහළ නිලධාරියකු පැවැසූවේ ජාතික ආරක්ෂාවට මුවා වී කිසිවකුටත් මිනී මැරීමට අවසරයක් නැති බවත් අවශ්‍ය රාජකාරියෙන් හා නීතියට පිටින් කටයුතු කර ඇති සියළුම ආරක්ෂක අංශ සාමාජිකයන්ට එරෙහිව කටයුතු කරන බවය.
එහෙත් පසුගිය සඳුදා යුධ හමුදා බුද්ධි අංශය විසින් පවත්වා ගෙන ගිය ගිරිතලේ රහස් කඳවුර පරික්ෂා කිරීමටත්, එම සිද්ධි දාමයට අදාල බුද්ධි තොරතුරු ලබා ගැනීමටත් යුද හමුදාවට නියෝගයක් ලබාදෙන ලෙස අපරාධ පරීක්ෂණ දෙපාර්තමේන්තුව (CID) හෝමාගම මහේස්ත්‍රාත් අධිකරණයෙන් කළ ඉල්ලීමද ප්‍රතික්ෂේප විය.
ප්රගීත් එක්නැලිගොඩ මහතා අතුරුදහන්වීම සම්බන්ධයෙන් හෝමාගම මහේස්ත්‍රාත් අධිකරණයේ විභාගවන නඩුව පෙරේදා යළි කැඳවූ අවස්ථාවේදී, අපරාධ පරීක්ෂණ දෙපාර්තමේන්තුව කළ ඉල්ලීමට එරෙහිව යුධ හමුදාව වෙනුවෙන් ඉදිරිපත්වූ නීතිඥයින් කළ කරුණු දැක්වීම් සලකා බලා මහේස්ත්‍රාත්වරයා සිය තීරණය ප්‍රකාශ කළේය.
අපරාධ පරීක්ෂණ දෙපාර්තමේන්තුව ඉල්ලීමට ඉටුකළහොත් රහස් බුද්ධි තොරතුරු රැසක් අනාවරණය වීමේ ඉඩක් තිබෙන බවත්, එය ජාතික ආරක්ෂාවට බරපතල තර්ජනයක් විය හැකි බවටත්, හමුදාව වෙනුවෙන් ඉදිරිපත්වූ නීතිඥයින් කරුණු දැක්විය.
දෙපාර්ශවයේ කරුණු සලකා බැලු මහේස්ත්‍රාත් වරයා මෙම ඉල්ලීම සම්බන්ධයෙන් නීතිපතිවරයා ගෙන් නියෝගයක් රැගෙන එන්නැයි අපරාධ පරීක්ෂණ දෙපාර්තමේන්තුවට දැනුම් දුන්නේය.
යුධ හමුදා බුද්ධි අංශය විසින් මාධ්‍යවේදී ප්රගීත් එක්නැලිගොඩ මහතා පැහැරගෙන ගොස් ගිරිතලේ රහස් කඳවුරකදී ප්‍රශ්න කර ඇති බව අපරාධ පරීක්ෂණ දෙපාර්තමේන්තුව විසින් අනාවරණය කර ගෙන ඇතැයි පැවසේ.
