මේ අතර වසර ගණනකට පසුව රුපියල් කෝටි 11 ක කොටස් ප්‍රමාණයක් ව්‍යාජ බලපත්‍රයක් මඟින් විකුණුවා කියමින් මුල්‍ය වංචාවක් සම්බන්ධ නඩුවකට තමන්ව පටලවන ලද්දේ පාඨලී චම්පිකගේ වෛරය විසින් බව ගම්මන්පිල පවසා ඇතැයි වාර්තා වෙයි. ඒකාබද්ධ විපක්ෂයේ මන්ත්‍රීවරුන් ඔහුව බැලීම සඳහා මැගසින් බන්ධනාගාරයට ගිය අවස්ථාවේ මේ බව ඔහු සිය හිතවතුන්ට පවසා ඇති අතර එහිදී රණවක අමාත්‍යවරයාගේ අම්මා අප්පා සිහිකර දැඩි ආවේගයෙන් කතා කර ඇතිබවද වාර්තා වෙයි.
වැඩිදුරටත් බ්‍රයන් ෂැඩික් පවසන ලෙස ඔහු ඕස්ට්‍රේලියානු ලංකා සමාගමේ ආයෝජකයෙකු වශයෙන් කටයුතු කරන සමයේ එහි සම කොටස් කරුවෙකු වූ සිඩ්නි ජයසිංහ සමඟ එකතුව ගම්මන්පිල මෙම මුල්‍ය වංචාව සිදුකර ඇත. ඒ සමයේ ගම්මන්පිල සමාගමේ ප්‍රධාන විධායක නිලධාරියා ලෙස කටයුතු කර ඇත. අනතුරුව ගම්මන්පිල - සිඩ්නි එකතුව සිඩ්නිගේ පුතා හරහා රටින් පිට වන ලෙස බ්‍රයන් ෂැඩික්ට මරණීය තර්ජන එල්ල කොට ඇත. එනිසා ඔහු රටින් පිටව ගොස් ඇති අතර පසුව තමන්ට සිදුවූ අවනඩුව ඉදිරිපත් කරන්නට උත්සහ කළත් එවකට පවතී දේශපාලන වටපිටාව තුළ ඊට ඉඩක් ලැබී නැත.
