ඒ අනුව අද ගෙන එනවා යැයි කියන විශ්වාසභංග යොජනාව කිසිවකු හො ඉදිරිපත් කළ ද ඊට සුළුතරයකවත් සහය අහිමි වන තත්වයක් පෙනෙන්නට තිබේ.
මේ අතර එක්‌සත් ජාතික පක්‍ෂයේ මන්ත්‍රීවරුන් විසින් අගමැති රනිල් වික්‍රමසිංහ මහතාට එරෙහිව විශ්වාසභංග යෝජනාවක්‌ ගෙන එන්නේ නැතැයි මේ යෝජනාව ගෙන එන ලබන්නෙක් ලෙස මාධ්‍ය විසින් හැඳින් වූ විදේශ කටයුතු රාජ්‍ය ඇමැති වසන්ත සේනානායක දිවයින පුවත්පතට ප්‍රකාශ කර තිබේ.
ඒකාබද්ධ විපක්‍ෂය විසින් අගමැතිවරයාට එරෙහිව විශ්වාසභංග යෝජනාවක්‌ ගෙන එනවානම් ඊට සහාය දීම හෝ නොදීම පිළිබඳ තීරණය කරනුයේ එහි ඇතුළත් කරුණු පිළිබඳ අවධානය යොමු කළ පසුව බවද සේනානායක මහතා වැඩිදුරටත් ප්‍රකාශ කළේය.
එමෙන්ම වෙනත් පාර්ශවයක්‌ විසින් අගමැතිවරයාට එරෙහිව විශ්වාසභංග යෝජනාවක්‌ ගෙන ආවොත් ඊට සහය දීම පිළිබඳ තම පක්‍ෂයේ කණ්‌ඩායම සමග සාකච්ඡා කළ යුතු බවද හෙතෙම පැවසුවේය.
එසේම ඒකාබද්ධ විපක්‍ෂය විසින් අද (06 දා) දවස ඇතුළත අගමැතිවරයාට එරෙහි විශ්වාසභංග යෝජනාවක්‌ පාර්ලිමේන්තුවේදී කථානායකවරයා වෙත භාරදීමට තීරණය කර ඇතැයි ද වාර්තා වේ.
යම් හෙයකින් එක්‌සත් ජාතික පක්‍ෂයේ මන්ත්‍රීවරුන් කණ්‌ඩායම අගමැතිවරයාට එරෙහිව විශ්වාසභංග යෝජනාවක්‌ අද ඉදිරිපත් කරන්නේ නම් එහි අඩංගු කරුණු සලකා බලා ඒකාබද්ධ විපක්‍ෂයේ මන්ත්‍රීවරුන් ද ඊට අත්සන් තබන බව ඒකාබද්ධ විපක්‍ෂයේ මන්ත්‍රී රංජිත් සොයිසා ඊයේ (05 දා) ප්‍රකාශ කරයි.
දැනටමත් තම විශ්වාසභංග යෝජනාව සඳහා ඒකාබද්ධ විපක්‍ෂයේ මන්ත්‍රීවරුන් තිහකට අධික සංඛ්‍යාවකගේ අත්සන් ලැබී ඇතැයි පැවසූ රංජිත් සොයිසා මහතා මේ සම්බන්ධව සාකච්ඡා කිරීම සඳහා මහින්ද රාජපක්ෂ ප්‍රධානත්වයෙන් අද උදෑසන සාකච්ඡා කර තීරණයක් ගන්නා බව පවසයි
