බැඩ්මින්ටන් සංගමයේ නිලතලවලට නාමයෝජනා භාරදෙන ඕනෑම පුද්ගලයෙකුගේ අයැදුම්පත් පිළිගෙන ඒවා ක්‍රීඩා අමාත්‍යාංශය වෙත යොමු කිරීමට පසුගියදා රැස්වූ විශේෂ සභාවකදී තීරණය වූ බව සභාපති සුරාජ් දන්දෙනිය මහතා පැවැසීය.
“අපි වැඩ කරන්නේ ක්‍රීඩා අමාත්‍යාංශය කියන විදිහටයි. අමාත්‍යාංශය තීරණය කළ යුතුයි ඡන්දය ඉල්ලන්න සුදුසු කව්ද, නුසුදුසු කව්ද ? කියා. අප සියලුම නාමයෝජනා ක්‍රීඩා අමාත්‍යාංශයට යොමු කරනවා” දන්දෙනිය මහතා පැවැසීය. ශ්‍රී ලංකා බැඩ්මින්ටන් සංගමයේ නාමයෝජනා භාරගැනීම අප්‍රේල් මස 20වැනිදා දහවල් 12.00ට අවසන් වේ.
මේ නිලවරණයට අදාළ නාමයෝජනා මෙයට පෙර භාරගෙන තිබූ අතර එහිදී සභාපති තනතුරට සුරාජ් දන්දෙනිය හා මහාචාර්ය රංජිත් ද සිල්වා යන මහත්වරු ඉදිරිපත්ව සිටියහ. එමෙන්ම ලේකම්, උප සභාපති ආදී තනතුරුවලට තරගයක් නිර්මාණයවී තිබුණි.
එහෙත් ක්‍රීඩා සංගමයක වසර 4ක් කටයුතු කළ අයට නැවැත තනතුරු දැරීමේ හැකියාව නොමැති බවට ලැබුණු නීතිපති උපදෙස් සමග එතෙක් භාරගෙන තිබූ ක්‍රීඩා සංගම් නිලවරණ නාමයෝජනා සියල්ල අවලංගු බවට අමාත්‍යාංශ නියෝගයක් නිකුත් විය.
වසර හතරේ නීතිය අනුව ශ්‍රී ලංකා බැඩ්මින්ටන් සංගමයේ දැනට තනතුරු දැරූ නිලධාරීන්ගෙන් අඩකට වැඩි පිරිසකට නාමයෝජනා භාරදීමේ අවස්ථාව අහිමිවී යනු ඇත. එබැවින් බැඩ්මින්ටන් පරිපාලනයට නවක පිරිසක් එක්වීමේ අවස්ථාව මෙවර ඡන්ද විමසීමේදී සිදුවනු ඇත.
මේ අතර බස්නාහිර පළාත් බැඩ්මින්ටන් සංගමයේ ලේකම් අසංක පීරිස් මහතා ශ්‍රී ලංකා බැඩ්මින්ටන් සංගමයෙන් ලිඛිතව විමසා සිටින්නේ ඉදිරි නිලවරණයේදී මාධ්‍යවේදීන්ට, ක්‍රීඩක ක්‍රීඩිකාවන්ගේ මවුපියන්ට, පුහුණුකරුවන්ට, විනිසුරුවන්ට හා ජාතික තලයේ ක්‍රීඩක ක්‍රීඩිකාවන්ට නාමයෝජනා භාරදීමේ අවස්ථාව හිමිවන්නේද? යන්නය. එමෙන්ම ක්‍රීඩා භාණ්ඩ අලෙවිකරන ආයතනයක හිමිකරුවෙකු නාමයෝජනාවක් ඉදිරිපත්කර ඇත්නම් එය පිළිගන්නේද යන්න ඔහු වැඩිදුරටත් විමසා සිටී.
dinamina
