ලක්‌මාල්ගේ වම් පාදයේ වළලුකරට ඉහළ ප්‍රදේශයේ හටගෙන තිබෙන ආබාධයක්‌ හේතුවෙන් එලෙස ඔහුට සති 4 ක පමණ කාලයක්‌ විවේක ගැනීමට උපදෙස්‌ ලැබී තිබේ.

එමෙන්ම දකුණු අප්‍රිකාව අතර ගාල්ල ජාත්‍යන්තර ක්‍රීඩාංගණයේ පැවැති ටෙස්‌ට්‌ තරගයේ පන්දු රකිමින් සිටියදී තුවාල ලැබූ ශමින්ද එරංගගේ තත්ත්වයද තවමත් යහපත් අතට හැරී නොමැතිවීම ශ්‍රී ලංකාවට තරමක්‌ ගැටලුකාරී තත්ත්වයක්‌ උද්ගත කරවන්නක්‌ බවට පත්ව තිබේ.

එම තරගය අතරතුරදී තුවාල ලැබීම මත ශමින්දගේ අතට මැහුම් 8 ක්‌ යොදා තිබෙන නමුත් පාකිස්‌තානය සමග හෙට (06 දා) ගාල්ලේදී ආරම්භ වන ටෙස්‌ට්‌ තරගයට ඔහුව සහභාගි කරවීමට හැකි සෑම උත්සාහයක්‌ම ගනු ලබන බව මේ පිළිබඳව කරන ලද විමසීමකදී ශ්‍රී ලංකා කණ්‌ඩායමේ කළමනාකරු මයිකල් ද සොයිසා මහතා සඳහන් කර සිටියේය.

ශමින්ද මේ දිනවලදී ශ්‍රී ලංකා කණ්‌ඩායම සමග ගාල්ල ජාත්‍යන්තර ක්‍රීඩාංගණයේ පැවැත්වෙන පුහුණු සැසිවලට සහභාගිවෙමින් සිටින අතර ඔහුගේ දායකත්වය පිළිබඳව ඊයේ සවස්‌ වනතුරුත් කිසිදු එකඟතාවකට පැමිණ නොතිබිණි.

ඒ පිළිබඳව අදහස්‌ දක්‌වා සිටි සොයිසා මහතා, ශමින්දගේ තත්ත්වය දැන් තරමක්‌ යහපත් අතට හැරී තිබෙන බවත් ඉදිරි දින දෙක තුළදී ඔහුගේ සෞඛ්‍ය තත්ත්වය පිළිබඳව සලකා බලා පළමු ටෙස්‌ට්‌ තරගයට යොදවනවාද යන්න තීරණය කිරීමට නියමිත බවත් සඳහන් කර සිටියේය.