රාජ්‍ය ආයතන දෙකක නිලධාරීන් මත්කුඩු ජාවාරමට සම්බන්ධ බවට තොරතුරු වාර්තා වී ඇතැයි ජනාධිපති මෛත‍්‍රීපාල සිරිසේන මහතා පවසයි. ඔහු පෙන්වා දෙන්නේ ඉකුත් සතියේදී තමන්ට ඒ සම්බන්ධයෙන් තොරතුරු වාර්තා වූ බව ජනාධිපතිවරයා පැවසුවේය.වාණිජ මණ්ඩලයේ නිලධාරීන් හමු‍වී කරන ලද සාකච්ඡාවකදී ඔහු මේ බව සඳහන් කළේය.

බොදු බල සේනා සංවිධානය සිය දේශපාලන පක්ෂය BJP Sri Lanka ලෙස නම් කිරීමේ සූදානමක් පවතින බවට ප්‍රවෘත්තියක් පළ වී තිබිණි. අප කවුරුත් දන්නා BJP ය ඉන්දියාවේ දැනට පාලන බලය හොබවන නරේන්ද්‍ර සිං මෝදි ද අයත් භාරතීය ජනතා පක්ෂයයි. එම පක්ෂයට ද දැඩි හින්දු අන්තවාදී ඉතිහාසයක් ඇත. 2002 වසරේදී ගුජරාට් ප්‍රාන්තයේ සිදු කෙරුණු මුස්ලිම් සමූහ ඝාතනයකට අනුබල දීම සම්බන්ධව චෝදනා එවකට එහි මහ ඇමතිවරයාව සිටි වත්මන් ඉන්දීය අගමැති මෝදිට ද එල්ල වී තිබිණි. ඒ අනුව බලන කල පසුගිය වසරේ අලුත්ගම දී එවන් වාර්ගික සංහාරයක් වෙනුවෙන් වූ අත්හදා බැලීමක් කරන ලද බොබසේට එම නාමය දැරීමට යම් සුදුසු කමක් ද වර්ගවාදී මානයෙන් තිබේ.

මැතිවරණයට ඉදිරිපත් වන අපේක්ෂකයින් මත්ද්‍රව්‍ය ජාවාරමට සම්බන්ධද, නැද්ද යන්න පිළිබඳව සහතිකයක් ලබාදීමට අන්තරායකර ඖෂධ පාලක මණ්ඩලය තීරණය කර තිබේ.

පිරිවෙන් අධ්‍යාපන අධ්‍යක්ෂ තනතුර තවදුරටත් පුරප්පාඩු වී පවතින බව වාර්තාවේ. වසර තුනක පමණ කාලයක් තිස්සේ අදාළ තනතුර සදහා කිසිදු නිලධාරියෙකු පත් කර නොමැත. ඇතැමුන් එම තනතුර සදහා භික්ෂූවක් අවශ්‍ය බව ප්‍රකාශ කිරීමත් තවත් පිරිසක් ගිහි අයෙකු අදාළ තනතුරට පත් කරන ලෙසට ඉල්ලා තිබීමත් මත එම තත්ත්වය උද්ගතව තිබේ.

සිංහල හා දෙමළ අන්තවාදීන් කවුරුන්ද යන්න මේ අවස්ථාව වනවිට හෙළිදරව් වී ඇති බව විදේශ අමාත්‍ය මංගල සමරවීර මහතා පවසයි.ඔහු මේ බව පැවසුවේ ඊයේ(24) පැවති මාධ්‍ය හමුවක් අමතමිනි.

ලක් සතොසට යළි පණදීම සඳහා රුපියල් කෝටි හත්දහස් පන්සියයක නව ආයෝජනයක් සිදුකිරීමට රජය තීරණය කොට තිබේ. ලබන මස 07 වැනිදා සිට නව වෙළෙඳසැල්වලින් ජනතාවට සේවා සැපැයීම ආරම්භ කිරීමට ද නියමිතය.

ඉන්දියාවේ හිටපු ජනාධිපති ආචාර්ය අබ්දුල් කලාම් මහතා තෙදින නිල සංචාරයක් සඳහා අද (25) දිවයිනට පැමිණීමට නියමිතය.

ජනතා විමුක්ති පෙරමුණේ හිටපු නායක සෝමවංශ අමරසිංහ මහතා විසින් පිහිටවනු ලබන පක්ෂයේ පළමු සමුළුව සෙනසුරාදා උදෑසන 10.00ට නව නගර ශාලාවේදී පැවැත්වේ.